გამოყენების პირობები
ბოლო განახლება: Nov 12, 2026
1. ზოგადი დებულებები
1.1. წინამდებარე გამოყენების პირობები (შემდგომში — „პირობები“) არეგულირებს ვებგვერდის saxli-24.ge და saxli-24.ge-ის Android და iOS მობილური აპლიკაციების (შემდგომში ერთად — „პლატფორმა“) გამოყენებას.
1.2. პლატფორმას ფლობს და მართავს:
- სახელწოდება: ინდივიდუალური მეწარმე ირაკლი ლოლაძე (შემდგომში — „Saxli24“ ან „ჩვენ“)
- მისამართი: მთაწმინდის შესახვევი 9/11, თბილისი, საქართველო
- ელ-ფოსტა: [email protected]
1.3. პლატფორმა მომხმარებლებს საშუალებას აძლევს, განათავსონ და მოიძიონ უძრავი ქონების გაყიდვისა და გაქირავების (გრძელვადიანი და მოკლევადიანი) განცხადებები საქართველოს მასშტაბით და ერთმანეთს პლატფორმის ჩატის მეშვეობით დაუკავშირდნენ.
1.4. ჩვენ ვართ შუამავალი მომსახურების მიმწოდებელი „ელექტრონული კომერციის შესახებ“ საქართველოს კანონის მნიშვნელობით. ჩვენ არ ვყიდით, არ ვაქირავებთ და არ ვთავაზობთ განცხადებებში მითითებულ ქონებას და არ ვართ მომხმარებლებს შორის დადებული გარიგების მხარე.
1.5. პლატფორმაზე რეგისტრაციით, ავტორიზაციით ან განცხადების განთავსებით თქვენ ადასტურებთ, რომ გაეცანით და ეთანხმებით წინამდებარე პირობებსა და კონფიდენციალურობის პოლიტიკას. თუ არ ეთანხმებით პირობებს, გთხოვთ, არ ისარგებლოთ პლატფორმით.
2. ტერმინთა განმარტება
- მომხმარებელი — ნებისმიერი ფიზიკური ან იურიდიული პირი, რომელიც სარგებლობს პლატფორმით, მათ შორის არარეგისტრირებული ვიზიტორი.
- განმცხადებელი — მომხმარებელი, რომელიც პლატფორმაზე ათავსებს განცხადებას (მესაკუთრე, აგენტი, სააგენტო ან დეველოპერი).
- ანგარიში (პროფილი) — მომხმარებლის მიერ პლატფორმაზე შექმნილი პირადი ანგარიში.
- ავტორიზაცია — ანგარიშზე წვდომა ელ-ფოსტითა და პაროლით, ტელეფონის ნომრითა და SMS-კოდით, ან Google-ის, Facebook-ის ან Apple-ის ანგარიშით.
- განცხადება — პლატფორმაზე განთავსებული ინფორმაცია უძრავი ქონების გაყიდვის ან გაქირავების შესახებ, მათ შორის ტექსტი, ფოტოები და ფასი.
- ჩატი — პლატფორმის შეტყობინებების სერვისი მომხმარებლებს შორის, ასევე მომხმარებლებსა და ჩვენს მხარდაჭერას შორის.
- Pro ანგარიში — ანგარიშის სტატუსი, რომელსაც მომხმარებელს ვანიჭებთ მასთან დადებული ცალკე შეთანხმების საფუძველზე.
- ოპერაცია — ანგარიშის მეშვეობით შესრულებული ნებისმიერი მოქმედება (განცხადების განთავსება ან რედაქტირება, შეტყობინების გაგზავნა, მონაცემების შეცვლა).
- წვდომის კოდები — პაროლი, SMS-კოდი ან სხვა კონფიდენციალური მონაცემი, რომლითაც ხდება ავტორიზაცია.
3. რეგისტრაცია და ანგარიში
3.1. განცხადებების განსათავსებლად, ჩატით სარგებლობისა და რჩეული განცხადებების შესანახად საჭიროა რეგისტრაცია მობილური ტელეფონის ნომრით ან ელ-ფოსტით, ან ავტორიზაცია Google-ის, Facebook-ის ან Apple-ის ანგარიშით. ტელეფონის ნომერი დასტურდება SMS-კოდით. განცხადების განსათავსებლად საჭიროა დადასტურებული ტელეფონის ნომერი.
3.2. რეგისტრაციით თქვენ ადასტურებთ, რომ:
- ხართ 18 წლის ან უფროსი ასაკის ქმედუნარიანი პირი, ან უფლებამოსილი ხართ იმოქმედოთ თქვენ მიერ წარმოდგენილი იურიდიული პირის სახელით;
- მიუთითებთ ზუსტ და რეალურ მონაცემებს და დროულად განაახლებთ მათ;
- იყენებთ მხოლოდ თქვენს სარგებლობაში არსებულ ტელეფონის ნომერსა და ელ-ფოსტას.
3.3. აკრძალულია:
- სხვა პირის მონაცემებით რეგისტრაცია ან სხვა პირად ან კომპანიად თავის წარდგენა;
- შეურაცხმყოფელი ან შეცდომაში შემყვანი მომხმარებლის სახელის გამოყენება;
- ერთზე მეტი ანგარიშის შექმნა ჩვენი თანხმობის გარეშე — დამატებითი ანგარიშები შესაძლოა დაიბლოკოს ან წაიშალოს;
- ანგარიშის სხვა პირისთვის გადაცემა ჩვენი თანხმობის გარეშე.
3.4. თქვენ პასუხისმგებელი ხართ წვდომის კოდების უსაფრთხოებაზე და თქვენი ანგარიშით შესრულებულ ყველა ოპერაციაზე. თუ ეჭვი გაქვთ, რომ ანგარიშზე წვდომა სხვამ მოიპოვა, დაუყოვნებლივ შეცვალეთ პაროლი და დაგვიკავშირდით.
3.5. ჩვენ უფლებამოსილი ვართ, ნებისმიერ დროს მოვითხოვოთ თქვენ მიერ მითითებული მონაცემების გადამოწმება.
3.6. ანგარიშის დახურვა: ანგარიშის წაშლა შეგიძლიათ ნებისმიერ დროს აპლიკაციაში ან ვებგვერდზე — შედით ანგარიშზე, გადადით „პროფილზე“, ჩამოსქროლეთ ბოლომდე და დააჭირეთ „ანგარიშის წაშლას“ (იხ. როგორ წავშალო ანგარიში). აპლიკაციაში ან ვებგვერდზე წაშლა დაუყოვნებლივ შედის ძალაში. მოთხოვნის გაგზავნა ასევე შეგიძლიათ რეგისტრირებული ელ-ფოსტიდან; მას ვასრულებთ არაუგვიანეს 10 სამუშაო დღისა.
3.7. ელ-ფოსტით გაგზავნილი წაშლის მოთხოვნის შესრულება შესაძლოა გადაიდოს, თუ არსებობს მიმდინარე დავა, თაღლითობის გამოძიება ან კანონით დადგენილი შენახვის ვალდებულება. მონაცემთა დამუშავება ანგარიშის დახურვის შემდეგ რეგულირდება კონფიდენციალურობის პოლიტიკით.
4. განცხადების განთავსების წესები
4.1. განმცხადებელი ვალდებულია, განცხადებაში მიუთითოს ზუსტი და სრული ინფორმაცია ქონების, მისი ფასის, მდებარეობისა და მდგომარეობის შესახებ. განმცხადებელი სრულად აგებს პასუხს განცხადების შინაარსსა და მის შედეგებზე. ჩვენ არ ვამოწმებთ განცხადებაში მითითებული ინფორმაციის სისწორეს.
4.2. განცხადების განთავსებით ადასტურებთ, რომ ხართ ქონების მესაკუთრე, ან გაქვთ მესაკუთრის თანხმობა/უფლებამოსილება მისი შეთავაზებისთვის.
4.3. ზოგადი წესები:
- ერთი და იგივე ქონება გამოაქვეყნეთ მხოლოდ ერთხელ — დუბლირებული განცხადებები წაიშლება;
- აირჩიეთ სწორი ქონების ტიპი და გარიგების ტიპი (იყიდება; ქირავდება — გრძელვადიანი, მოკლევადიანი ან ორივე) — არასწორი ტიპით განთავსებული განცხადება შესაძლოა უარყოფილ იქნეს ან მოიხსნას;
- ერთ განცხადებაში აღწერეთ მხოლოდ ერთი ობიექტი;
- მიუთითეთ რეალური ფასი და მდებარეობა;
- განცხადების ტექსტში არ მიუთითოთ ტელეფონის ნომრები, ელ-ფოსტის მისამართები, ბმულები ან სხვა საიტების დასახელებები — სხვა მომხმარებლები თქვენ ჩატის მეშვეობით გიკავშირდებიან.
4.4. ფოტოები:
- უნდა შეესაბამებოდეს განცხადებაში აღწერილ ქონებას და ასახავდეს მის რეალურ მდგომარეობას;
- არ უნდა შეიცავდეს საკონტაქტო ინფორმაციას, ბმულებს, სხვა საიტების ან კომპანიების ლოგოს და სახელს;
- არ უნდა შეიცავდეს პირადობის დოკუმენტებს, ადამიანთა იდენტიფიცირებად სახეებს ან სხვა პერსონალურ მონაცემებს;
- უნდა ეკუთვნოდეს თქვენ ან გქონდეთ მათი გამოყენების უფლება.
4.5. განცხადება არ უნდა იყოს ან შეიცავდეს:
- მცდარ, არაზუსტ ან შეცდომაში შემყვან ინფორმაციას, მათ შორის არარსებულ ქონებას ან სატყუარა ფასს;
- სხვა პირის განცხადების ასლს ან სხვა პირის ფოტოებს მათი თანხმობის გარეშე;
- შეურაცხმყოფელ, დისკრიმინაციულ ან მუქარის შემცველ შინაარსს;
- მოწოდებას უკანონო ქმედებისკენ ან კანონით აკრძალულ შინაარსს;
- რეკლამას იმ ობიექტის ან მომსახურების შესახებ, რომელიც არ არის განცხადების საგანი;
- მესამე პირების უფლებების, მათ შორის ინტელექტუალური საკუთრების ან პერსონალური მონაცემების დარღვევას.
4.6. Facebook-ის პროფილის ბმული, რომელსაც ანგარიშს ამატებთ, უნდა მიუთითებდეს თქვენს საკუთარ პროფილზე.
4.7. თითოეულ განცხადებას გამოქვეყნებამდე მოდერატორი განიხილავს. განცხადება აქტიურია, სანამ მას არ წაშლით ან არ მონიშნავთ, როგორც გაქირავებულს ან გაყიდულს. შესაძლოა გთხოვოთ, დაადასტუროთ, რომ განცხადება კვლავ აქტუალურია, და დავმალოთ განცხადებები, რომლებიც, სავარაუდოდ, აღარ არის აქტუალური.
4.8. განცხადების რედაქტირება ან წაშლა შეგიძლიათ ნებისმიერ დროს თქვენი ანგარიშიდან. გარიგების დასრულების შემდეგ, გთხოვთ, წაშალოთ განცხადება ან მონიშნოთ ის, როგორც გაქირავებული ან გაყიდული.
4.9. ახალ ანგარიშებს დღეში შეზღუდული რაოდენობის განცხადების განთავსება და შეზღუდული რაოდენობის მიმოწერის დაწყება შეუძლიათ.
4.10. წესების დარღვევის შემთხვევაში უფლებამოსილი ვართ, გაუფრთხილებლად უარვყოთ, დავმალოთ ან წავშალოთ განცხადება.
5. მომსახურება და საფასური
5.1. პლატფორმაზე განცხადებების განთავსება, ჩატით სარგებლობა და პლატფორმის სხვა ფუნქციები უფასოა. პლატფორმაზე გადახდები არ ხორციელდება და აპლიკაციაში შიდა შესყიდვები არ არის.
5.2. ჩვენ შეგვიძლია მომხმარებელს ცალკე შეთანხმების საფუძველზე მივანიჭოთ Pro ანგარიში. მისი პირობები, ფასი და ვადა განისაზღვრება ამ შეთანხმებით, ხოლო გადახდა ხორციელდება პლატფორმის გარეთ (მაგ., საბანკო გადარიცხვით, ანგარიშ-ფაქტურის საფუძველზე). Pro სტატუსი შესაძლოა ვადამდე შევწყვიტოთ, თუ მომხმარებელი დაარღვევს წინამდებარე პირობებს ან შეთანხმებას.
5.3. იურიდიულ პირებს ანგარიშ-ფაქტურა ეგზავნებათ საგადასახადო კანონმდებლობის შესაბამისად, rs.ge-ის მეშვეობით.
5.4. თუ პლატფორმაზე ფასიან სერვისებს დავნერგავთ, მათ ხელმისაწვდომობამდე წინამდებარე პირობებს განვაახლებთ.
6. მომხმარებლის ვალდებულებები და აკრძალული ქმედებები
6.1. პლატფორმით სარგებლობისას აკრძალულია:
- საქართველოს კანონმდებლობის ან წინამდებარე პირობების დარღვევა;
- თაღლითური, შეცდომაში შემყვანი ან დისკრიმინაციული ქმედება, მათ შორის წინასწარი გადახდის მოთხოვნა ქონების დათვალიერებამდე ყალბი საბაბით;
- სპამის, ჯაჭვური წერილების, პირამიდული სქემების ან მავნე პროგრამების გავრცელება;
- სხვა მომხმარებლის ანგარიშზე უნებართვო წვდომა ან მისი წვდომის კოდების მოპოვების მცდელობა;
- სხვა პირთა პერსონალური მონაცემების დამუშავება მათი თანხმობის ან კანონიერი საფუძვლის გარეშე, მათ შორის პლატფორმიდან მიღებული საკონტაქტო ინფორმაციის გამოყენება მარკეტინგისთვის;
- პლატფორმის მუშაობის შეფერხება ან მის ინფრასტრუქტურაზე ზედმეტი დატვირთვის შექმნა;
- შეურაცხმყოფელი, მუქარის შემცველი ან სხვაგვარად არაეთიკური მიმართვა ჩვენი თანამშრომლების ან სხვა მომხმარებლების მიმართ.
6.2. მონაცემთა ავტომატური შეგროვება: ჩვენი წინასწარი წერილობითი თანხმობის გარეშე აკრძალულია პლატფორმიდან განცხადებების, ფოტოების, მომხმარებელთა მონაცემების ან სხვა შინაარსის კოპირება, შეგროვება ან გამოყენება — მათ შორის რობოტების, scraper-ების, crawler-ების ან სხვა ავტომატური საშუალებებით — და მათი განთავსება სხვა ვებგვერდებზე ან აგრეგატორებში.
6.3. მოდერაცია: უფლებამოსილი ვართ, ნებისმიერ დროს განვიხილოთ განცხადებები, ანგარიშები და დასაჩივრებული ან ავტომატურად მონიშნული მიმოწერები, უარვყოთ ან მოვხსნათ განცხადება, ან დროებით დავმალოთ ის განხილვამდე. ჩატის შეტყობინებები ავტომატურად მოწმდება თაღლითობის ტიპურ ნიშნებზე; ასეთი შეტყობინება ადრესატს მიეწოდება უსაფრთხოების გაფრთხილებით (იხ. კონფიდენციალურობის პოლიტიკა).
6.4. პირობების დარღვევის, საეჭვო ან თაღლითური აქტივობის შემთხვევაში უფლებამოსილი ვართ, საკუთარი შეხედულებისამებრ და წინასწარი გაფრთხილების გარეშე:
- წავშალოთ ან დავბლოკოთ განცხადება;
- შევზღუდოთ, დავბლოკოთ ან გავაუქმოთ ანგარიში;
- შევაჩეროთ ოპერაცია;
- დავბლოკოთ წვდომა კონკრეტული IP მისამართიდან;
- ვაცნობოთ სამართალდამცავ ორგანოებს;
- მოვითხოვოთ მიყენებული ზიანის ანაზღაურება.
6.5. დაბლოკვის გასაჩივრება შეგიძლიათ ელ-წერილით მისამართზე [email protected]. საჩივარს განვიხილავთ გონივრულ ვადაში და გაცნობებთ გადაწყვეტილებას.
6.6. თაღლითობის შეტყობინება: თუ შეამჩნიეთ საეჭვო ქმედება, დაასაჩივრეთ შეტყობინება ჩატში („დასაჩივრება“), დაბლოკეთ მომხმარებელი („მომხმარებლის დაბლოკვა“) ან დაუკავშირდით ჩვენს მხარდაჭერას. არასდროს გადაიხადოთ წინასწარი თანხა ქონების დათვალიერებამდე და დოკუმენტების გადამოწმებამდე.
6.7. ნულოვანი ტოლერანტობა მიუღებელი კონტენტისა და შეურაცხმყოფელი მომხმარებლების მიმართ. Saxli24-ს აქვს ნულოვანი ტოლერანტობა მიუღებელი კონტენტისა და შეურაცხმყოფელი მომხმარებლების მიმართ. აკრძალულია შეურაცხმყოფელი, მუქარის შემცველი, შევიწროებითი, სიძულვილის ენის შემცველი, დისკრიმინაციული, სექსუალური ხასიათის, ძალადობრივი ან სხვაგვარად მიუღებელი კონტენტის განთავსება — განცხადებებში, ფოტოებში, თქვენს სახელში თუ ჩატის შეტყობინებებში — ისევე როგორც სხვა მომხმარებლების მიმართ შეურაცხმყოფელი ქცევა. ასეთ კონტენტზე ან მომხმარებელზე საჩივრის გაგზავნა ნებისმიერს შეუძლია აპლიკაციაში ან ვებგვერდზე. ყველა საჩივარს განვიხილავთ 24 საათის განმავლობაში; დადასტურების შემთხვევაში ვშლით კონტენტს და ვბლოკავთ მის ავტორ მომხმარებელს.
6.8. სხვა მომხმარებლების დაბლოკვა: ნებისმიერი მომხმარებლის დაბლოკვა შეგიძლიათ მიმოწერიდან, განცხადებიდან ან მისი პროფილიდან, ხოლო განბლოკვა — პროფილი → პარამეტრები → დაბლოკილი მომხმარებლები. დაბლოკილი მომხმარებელი ვეღარ მოგწერთ და ვეღარ დაიწყებს თქვენთან მიმოწერას, თქვენ კი ვეღარ დაინახავთ თქვენს მიმოწერას და, Saxli24-ის აპლიკაციაში, მის განცხადებებს. დაბლოკილ მომხმარებელს არ ეცნობება, რომ დაბლოკეთ. დაბლოკვისას შეგიძლიათ მომხმარებელი ჩვენს მოდერატორებთანაც დაასაჩივროთ („დაჩივლება და დაბლოკვა“).
7. ინტელექტუალური საკუთრება
7.1. პლატფორმა, მისი დიზაინი, სტრუქტურა, პროგრამული კოდი, ლოგო, სასაქონლო ნიშანი და ჩვენ მიერ შექმნილი შინაარსი წარმოადგენს ჩვენს ინტელექტუალურ საკუთრებას. მათი გამოყენება კომერციული მიზნით ჩვენი წინასწარი წერილობითი თანხმობის გარეშე აკრძალულია.
7.2. განცხადების განთავსებით თქვენ გვანიჭებთ არაექსკლუზიურ, უსასყიდლო უფლებას, პლატფორმის ფუნქციონირებისა და განცხადების პოპულარიზაციის მიზნით გამოვიყენოთ, ვაჩვენოთ, გავავრცელოთ და ტექნიკურად დავამუშაოთ (მაგ., შევცვალოთ ზომა და ფორმატი) განცხადების ტექსტი და ფოტოები, მათ შორის სხვა ვებგვერდებზე, სოციალურ ქსელებსა და რეკლამაში. უფლება მოქმედებს განცხადების პლატფორმაზე განთავსების განმავლობაში.
8. პასუხისმგებლობის ფარგლები
8.1. ჩვენ ვართ შუამავალი და არ ვართ მომხმარებლებს შორის დადებული გარიგების მხარე. ყიდვის, გაყიდვის, ქირავნობის ან სხვა გარიგების პირობებზე მხარეები თავად თანხმდებიან, ჩვენი მონაწილეობის გარეშე.
8.2. ჩვენ პასუხს არ ვაგებთ:
- განცხადებაში მითითებული ინფორმაციის სიზუსტეზე, ქონების ხარისხზე, იურიდიულ სტატუსზე ან ხელმისაწვდომობაზე;
- მომხმარებლებს შორის წარმოშობილ დავებზე და მათ მიერ მიყენებულ ზიანზე;
- აგენტების ან სხვა პირების მიერ მესაკუთრის განცხადების ან ფოტოების კოპირებაზე;
- მესამე პირების ვებგვერდებისა და სერვისების შინაარსზე, რომლებზეც მითითებულია ბმული;
- ზიანზე, რომელიც გამოწვეულია თქვენი წვდომის კოდების სხვა პირისთვის გამჟღავნებით.
8.3. ვცდილობთ, პლატფორმა მუშაობდეს შეუფერხებლად, თუმცა არ ვიძლევით გარანტიას, რომ ის იქნება უწყვეტი და შეცდომების გარეშე. პასუხს არ ვაგებთ ტექნიკური ხარვეზით, ტექნიკური სამუშაოებით ან დაუძლეველი ძალით (ფორს-მაჟორით) გამოწვეულ შეფერხებაზე.
8.4. ჩვენი პასუხისმგებლობა, კანონით დასაშვებ ფარგლებში, შემოიფარგლება შესაბამისი შეთანხმების საფუძველზე თქვენ მიერ ჩვენთვის გადახდილი თანხით (მაგ., Pro ანგარიშისთვის). ეს არ ზღუდავს ჩვენს პასუხისმგებლობას ჩვენი განზრახი ქმედებით ან უხეში გაუფრთხილებლობით მიყენებულ ზიანზე.
8.5. რეკომენდებულია, გარიგების დადებამდე ქონების დოკუმენტები გადაამოწმოთ საჯარო რეესტრის ეროვნულ სააგენტოში და, საჭიროების შემთხვევაში, მიმართოთ იურისტს ან ნოტარიუსს.
9. მარეგულირებელი კანონმდებლობა და დავები
9.1. წინამდებარე პირობები რეგულირდება საქართველოს კანონმდებლობით.
9.2. დავები წყდება მოლაპარაკებით. შეთანხმების მიუღწევლობის შემთხვევაში დავა განიხილება თბილისის საქალაქო სასამართლოში. მომხმარებელს ასევე შეუძლია მიმართოს კანონით გათვალისწინებულ სხვა უფლებამოსილ ორგანოს.
10. ცვლილებები პირობებში
10.1. ჩვენ უფლებამოსილი ვართ, შევცვალოთ წინამდებარე პირობები. განახლებული ვერსია ქვეყნდება პლატფორმაზე, ბოლო განახლების თარიღის მითითებით.
10.2. არსებითი ცვლილებების შესახებ ძალაში შესვლამდე 7 კალენდარული დღით ადრე გაცნობებთ ელ-ფოსტით, push-შეტყობინებით ან პლატფორმაზე შეტყობინებით. ცვლილების შემდეგ პლატფორმით სარგებლობის გაგრძელება ნიშნავს მასზე თანხმობას. თუ არ ეთანხმებით ცვლილებას, შეგიძლიათ დახუროთ ანგარიში.
10.3. თუ პირობების რომელიმე დებულება ბათილად იქნება ცნობილი, ეს არ იმოქმედებს დანარჩენი დებულებების ძალაზე.
10.4. ქართულ და ინგლისურ ვერსიებს შორის შეუსაბამობის შემთხვევაში უპირატესობა ენიჭება ქართულ ვერსიას.
11. კონტაქტი
- ელ-ფოსტა: [email protected]
- ჩატი: მხარდაჭერის ჩატი ვებგვერდსა და აპლიკაციაში; ჩვეულებრივ, ვპასუხობთ 24 საათის განმავლობაში
- მისამართი: მთაწმინდის შესახვევი 9/11, თბილისი, საქართველო
